2020-yil 22-iyul kuni soat 11:00 da Axborot va ommaviy kommunikatsiyalar agentligi binosida “2020-2021-o‘quv yili uchun oliy ta’lim muassasalarining bakalavriat ta’lim yo‘nalishlariga abituriyentlarni onlayn ro‘yxatga olish yakunlari: raqamli ma’lumotlar” mavzusida matbuot anjumani o‘tkazildi.

Matbuot anjumanida Davlat test markazi direktori o‘rinbosari Rajabov Sardor Baxtiyorovich, bosh boshqarma boshlig‘i Rajabov Barno Jo‘raqulovich, boshqarma boshlig‘i Qo‘chqarov Diyorbek Ulug‘bekovich ishtirok etdi.

Matbuot anjumanida taqdim etilgan ma’lumotlar:

2020-yil 20-iyul kuni oliy ta’lim muassasalarining bakalavriatiga abituriyentlarni onlayn ro‘yxatdan o‘tkazish ishlari yakunlandi.

Respublika bo‘yicha jami 91 ta oliy ta’lim muassasaciga kirish uchun 1 mln. 484 ming 085 nafar abituriyentlar ro‘yxatdan o‘tkazildi (2019-yilda – 1 mln. 66 ming 926 nafar). O‘tgan yilga nisbatan 417 ming 159 ta yoki 39,1 foiz ko‘p ro‘yxatdan o‘tgan. Shundan, joriy yil bitiruvchilari – 536 144 nafar (36,13 %)ni tashkil etdi.

Ta’lim shakllari bo‘yicha:

• kunduzgi ta’lim shakli – 798 608 nafar (53,81 %);
• sirtqi ta’lim shakli – 648 733 nafar (43,71 %);
• kechki ta’lim shakli – 36 744 nafar (2,48 %).

Tillar kesimida:

• o‘zbek tili – 1 297 445 nafar (87,42 %);
• rus tili – 139 115 nafar (9,37 %);
• qoraqalpoq tili – 44 279  nafar (2,98 %);
• boshqa tillar – 3 246 nafar (0,22 %).

Tanlov ko‘rsatkichi – o‘rtacha bir o‘ringa 10,57 tani tashkil etdi (11,61 ta).

Ro‘yxatga olishda 13 yoshdan 95 yoshgacha bo‘lgan abituriyentlar qayd etildi:

• Eng yosh abituriyent – 13 yosh (14 yoshga to‘lmagan);
• Eng yoshi katta abituriyent – 95 yosh.

Onlayn ro‘yxatdan o‘tkazish kunlik 24 soat davomida Davlat test markazining rasmiy veb-sayti, Yagona interaktiv davlat xizmatlari portali orqali va belgilangan 8 ta tumanda Davlat xizmatlari markazlari tomonidan amalga oshirildi.

Ro‘yxatdan o‘tkazishda abituriyentlarga joriy yilda 5 tagacha ta’lim yo‘nalishini tanlash huquqi berildi.

Abituriyentlarni test sinovlari boshlanishidan oldin ruhan qo‘llab-quvvatlash uchun “Onlayn ro‘yxatdan o‘tish”, “Test sinovlari o‘tkazilishi”, “Test jarayonida to‘ldiriladigan hujjatlar” nomli videoroliklar tayyorlandi. Videoroliklar ommaviy axborot vositalari va ijtimoiy tarmoqlarda namoyish etilmoqda.

Eng ko‘p hujjatlar quyidagi oliy ta’lim muassasalariga o‘qishga kirish uchun ro‘yxatdan o‘tkazilgan:

1. Samarqand davlat universiteti – 75 ming 325 nafar, shundan 32 903 nafari kunduzgi, 4 380 nafari kechki, 38 042 nafari sirtqi;
2. Qarshi davlat universiteti – 58 ming 118 nafar, shundan 24 432 nafari kunduzgi, 33 686 nafari sirtqi;
3. Andijon davlat universiteti – 57 ming 498 nafar, shundan 28 387 nafari kunduzgi, 29 111 nafari sirtqi;
4. Urganch davlat universiteti – 53 ming 255 nafar, shundan 25 471 nafari kunduzgi, 27 784 nafari sirtqi;
5. Termiz davlat universiteti – 51 ming 787 nafar, shundan 26 397 nafari kunduzgi, 394 nafari kechki, 24 996 nafari sirtqi.

Eng katta konkurs (birinchi tanlangan ta’lim yo‘nalishiga nisbatan):

• Andijon tibbiyot instituti – 1 o‘ringa 27,81 tani;
• Toshkent davlat yuridik universiteti – 1 o‘ringa 24,35 tani;
• Toshkent tibbiyot akademiyasi – 1 o‘ringa 24,2 tani;
• Toshkent tibbiyot akademiyasi Farg‘ona filiali – 1 o‘ringa 22,58 tani;
• Navoiy davlat konchilik instituti – 1 o‘ringa 19,5 tani tashkil etdi.

Abituriyentlar quyidagi ta’lim yo‘nalishlariga eng ko‘p ro‘yxatdan o‘tkazildi:

Samarqand davlat universitetining “Boshlang‘ich ta’lim va sport-tarbiyaviy ish” ta’lim yo‘nalishi sirtqi ta’lim shakli o‘zbek guruhiga – 9013 nafar;

Qarshi davlat universitetining “Boshlang‘ich ta’lim va sport-tarbiyaviy ish” ta’lim yo‘nalishi sirtqi ta’lim shakli o‘zbek guruhiga – 7945 nafar;

Samarqand davlat universitetining “Maktabgacha ta’lim” ta’lim yo‘nalishi sirtqi ta’lim shakli o‘zbek guruhiga – 7890 nafar.

2020-2021-o‘quv yilida abituriyentlardan tushgan arizalar haqida ma’lumot:

• Toshkent shahridagi 29 ta OTMga jami 399 415 ta;
• Samarqand viloyatidagi 9 ta OTMga jami 139 874 ta;
• Farg‘ona viloyatidagi 7 ta OTMga jami 114 992 ta;
• Andijon viloyatidagi 4 ta OTMga jami 106 697 ta;
• Qashqadaryo viloyatidagi 6 ta OTMga jami 99 925 ta;
• Surxondaryo viloyatidagi 6 ta OTMga jami 90 663 ta;
• Qoraqalpog‘iston Respublikasidagi 9 ta OTMga jami 82 397 ta;
• Toshkent viloyatidagi 4 ta OTMga jami 79 544ta;
• Namangan viloyatidagi 3 ta OTMga jami 79 024 ta;
• Jizzax viloyatidagi 3 ta OTMga jami 72 761 ta;
• Buxoro viloyatidagi 4 ta OTMga jami 67 485 ta;
• Xorazm viloyatidagi 3 ta OTMga jami 60 314 ta;
• Navoiy viloyatidagi 2 ta OTMga jami 48 595 ta;
• Sirdaryo viloyatidagi 2 ta OTMga jami 42 399 ta.

Test sinovlarisiz, kasbiy (ijodiy) imtihonlar orqali o‘qishga qabul qilinadigan ta’lim yo‘nalishlariga abituriyentlardan 122 ming 612 ta (kunduzgi – 69 228 ta, kechki – 971 ta, sirtqi – 52 413 ta) ariza qabul qilindi.

Imtiyozlar:

• Xotin-qizlar – 17 970 (to‘liq kiritilmagan);
• So‘x tumani – 2973;
• To‘liq davlat ta’minotidagi shaxslar – 365 ta;
• Zulfiya nomidagi Davlat mukofoti sohibaslari – 9 ta;
• “Tarbiyachi” respublika tanlovi g‘oliblari – 6 ta;
• “Nihol” mukofoti sovrindorlari – 3 ta;
• Xalqaro va respublika olimpiadalari, tanlovlar va musobaqalar g‘oliblari – 2493 ta;
• Yoshlar ittifoqi tavsiyanomasi – 14 ta;
• Harbiy xizmatchilarning farzandlari (5% lik) – 3133;
• Harbiy xizmatchilarning farzandlari (otasi (onasi) halok bo‘lgan yoki nogiron bo‘lib qolgan) – 130;
• Ichki ishlar organlari xodimlari farzandlari (3% lik) – 2256;
• Ichki ishlar organlar xodimlari farzandlari (otasi (onasi) halok bo‘lgan yoki nogiron bo‘lib qolgan) – 49;
• Temurbeklar maktablari bitiruvchilari – 1029 ta.

20-iyundan 20-iyulga qadar ro‘yxatdan o‘tish davomida abituriyentlar tomonidan 8660 ta hujjat chet tili sertifikati sifatida dasturga kiritildi.

Bularning barchasi Davlat test markazi tomonidan tekshirildi va 8079 ta sertifikat o‘z tasdig‘ini topdi. 581 ta sertifikat esa talabga javob bermasligi aniqlandi.

Misol uchun, 200 ta sertifikatda tilni bilish darajasi B2 dan past ekanligi, 117 ta sertifikat milliy yoki xalqaro imtihon tizimlaridan olinmaganligi (o‘quv markazlari tomonidan berilgan yoki xalqaro bo‘lmagan sertifikatlar), 69 ta sertifikatda amal qilish muddati tugaganligi, 7 ta holatda sertifikatlarning haqiqiy emasligi, 9 tasida sertifikat boshqa shaxsga tegishli ekanligi aniqlandi.

Matbuot anjumani yakunida OAV vakillarining savollariga batafsil javob berildi.